Day 10 大甲鎮瀾宮＞台中傳統糕餅DIY＞高美濕地＞梧棲漁港
一落高鐵，就見到有人拎住我地嘅名牌黎迎接我地喇！
我地黎到台中第1個行程就係拼車台中高美半日遊，呢架車有9個位置，好豪華呢！
接埋其他團友，我地就開始喺台中嘅旅程喇！
同車仲遇到幾位香港嘅朋友！哈！原來佢地都係透過KKDAY 報名嘅呢！
第1站：大甲鎮瀾宮
我地繼係澎湖之後，第2次黎媽祖廟喇！
大甲鎮瀾宮係全台最知名嘅媽祖廟之一，亦都係大甲最具代表性嘅景點。
我地就用我地喺澎湖學嘅禮儀，入廟參觀下先！
廟內個頂好精緻呢！
之後導遊同我地講原來呢度仲有個金媽祖架！好多人黎參觀都會睇漏眼呢！
因為個金媽祖喺地下室！
呢度記載左媽祖嘅歷史，有圖解亦都有文字！
媽祖嘅金身就唔方便影相喇！大家有機會去鎮瀾宮，不要錯過看金媽祖呢！
喺鎮瀾宮有個大振草帽草蓆－導遊話呢度嘅草帽好受歡迎呢！
咁我地就入去睇下啦！哈！呢個河童草帽好可愛呢！呢度D 款式好搞笑，岩小朋友多D XD
第2站：傳統糕餅DIY
台中最著名嘅傳統糕餅有太陽餅、奶油酥餅、大甲芋頭酥、綠豆椪......我地呢一次嘅DIY就係芋頭酥喇！
黎到阿聰師糕餅館，個門神好可愛呀！佢地都分別拎著唔同嘅打蛋器、麵棍等工具，睇得出呢間店對製作糕點嘅熱誠！
喺阿聰師糕餅館DIY做芋頭酥，前3知步驟已經預備好了，我地當然係從簡單嘅捲皮開始啦！XD
首先糕餅師傅為我地解說製作過程同示範，睇落就好似幾易喇！
之後就到我地體驗製作糕餅喇！
哈哈！個樣同師傅個個有D差別，不過都做得唔錯呀！XD （自誇下先）
完成左就放入焗爐焗，等緊嘅時候我地就去參觀一下糕餅館喇！
我地由芋頭的起源開始......
呢一部係阿聰師傅買嘅第一部糕餅製作機器，同現在相比真係差得遠呢！
參觀過程中，有問問題有玩遊戲，禮物呢就係呢個媽祖身上嘅糕餅喇！
哈！當然唔係直接拎啦！Albey 好勁呀，好多關於種植、傳統歷史嘅問題都識答，我同同行嘅一班香港人都係完全唔識XD 果然唔同嘅成長環境，識嘅野都係唔同D，我地唯有靠玩遊戲贏禮物喇！XD
不知不覺我地嘅芋頭酥完成啦！估唔到仲有證書呢！
哈！我已經忍唔住食左個，好好食呀！！！
可惜唔可以直接帶番香港，因為我地仲有6日嘅行程，所以最後呢D芋頭酥都成為左我嘅宵夜XDXD
第3站：高美濕地
喺高美欣賞全台最美嘅夕陽，我地期待已夠喇！
大約5點半左右，我地黎到左濕地步道，個時海水仲未開始退，我地就邊行邊影，愈行就愈覺得一個景比一景靚呢！
高美濕地有120多種嘅鳥類棲息，係重要嘅生態保育區！
喺欣賞夕陽前，我地先坐喺濕地步道上欣賞下呢度嘅濕地生物啦！
有好多唔同品種嘅螃蟹呢！
仲有白鶴呀！
中間發生左D蝦碌事呢XD Albey 頂帽被吹左落草堆呀XD
行到中間嘅時候，濕地步道會分開成兩邊，方便影相，又可以分散人流！
夕陽下嘅風車，好靚，好想留住呢一刻！
行到步道嘅盡頭，落水後又係另一個景色！
要影靚靚嘅”夕陽下的風車”，唔可以只停留喺步道上，一定要落水呀！
直到接近6點嘅時候，海水先慢慢退，靚到好似一幅畫咁呀！
夕陽反映喺海面上，真係好靚呀！
真係即刻要唱番首夕陽無限好......天色已黃昏......
（哈！呢個情況下唱終於有人聽得明喇！XD）
第4站：梧棲漁港
梧棲漁港喺台中重要嘅漁業港口，亦都係休閒觀光嘅海港！
但我地成團人去到嘅反應係......
可能係太大落差喇XDXD 睇完咁靚嘅夕陽，突然黎到個就黎收檔嘅漁港！
我地不若而同心諗”我地黎呢度做咩呢？”
哈！其實呢到唔係一個唔好嘅地方，係唔岩時間姐！相信早上黎應該熱鬧好多呀！
睇睇下呢度有D 似香港嘅一D碼頭呢！
收檔都有收檔好處，就係D 魚生好平呀！真係好想買番去做宵夜呀，又一個唔岩Timing，我地晚上會去夜市>.< 到時一定食到好飽呢！
除左海鮮市場、呢度仲有海鮮乾貨、熟食等等，好地道呢！
